Giòbia, su 24 de abrili, at torrau a obèrriri su servìtziu linguìsticu subracomunali in su territòriu de su Sarcidanu-Barbàgia de Seulu. Su progetu nou, numenau po s’annualidadi 2024 “Fueddaus e faeus” , est finantziau de sa Lei Natzionali 482/1999 po s’Amparu de is Minorias Linguìsticas Istòricas, artt. 9 e 15, e de is Leis Regionalis 22/2018 e 6/2012 – TuLiS “Tutela lingue Sarde” po s’umpreu de is fundus segundu s’art. 10, commas 3, 4 e 5 de sa LR 22/2018.
Is comunus interessaus in su progetu ant a èssiri doxi: Ìsili (comunu cabufila), Iscroca, Stersili, Geroni, Gergei, Nuragus, Nuradda, Arroli, Sàdili, Serri, Seulu e Biddanoa ‘e Tulu. S’operadora at a èssiri a disponimentu po 16 oras a sa cida partzias in is sedis diferentis e su calendàriu at a èssiri publicau in su blog de su sportellu linguìsticu https://ulsarcidanubarbagia.wordpress.com. Sa punna de su servìtziu est cussa de sighiri s’atividadi de promotzioni e avaloramentu de sa lìngua sarda, incumentzada in su 2006 cun s’abertura de su primu sportellu linguìsticu finantziau de sa L. 482/1999, donendi sèmpiri atentu a sa relata cun su pùblicu, a su susténniu de sa comunicatzioni siat orali siat iscrita cun sa citadinàntzia in sa lìngua ogetu de amparu, s’agiornamentu de su situ istitutzionali e de is canalis sotzialis de sa retza cun totu is novas chi pertocant is entis pùblicus, sa promotzioni e sa gestioni de progetus spetzìficus cun atividadis de tradutzioni, interpretatzioni e consuléntzia linguìstica po sa promotzioni de sa lìngua amparada aintru de amministratzionis comunalis, museus, bibliotecas, iscolas, assòtzius culturalis e àterus entis chi òberant in is comunus chi faint parti de su progetu.
